Bu gün Azərbaycanın görkəmli alimi, üç cildik “Azərbaycan xalçası” fundamental əsərinin müəllifi, Xalq rəssamı Lətif Kərimovun doğum günüdür. Lətif Kərimov dekorativ-tətbiqi sənətimizin, xüsusilə xalçalarımızın milli və bədii xüsusiyyətlərini, texnologiyalarını dərindən bilən, onların dünyada tanıdılmasında, xalq ənənələrinin dirçəldilməsi, inkişafı və zənginləşdirilməsində böyük rolu olan şəxsiyyətdir. Məhz onun təşəbbüsü ilə 1967-ci ildə dünyada xalçaların qorunub saxlanıldığı, öyrənildiyi, sərgiləndiyi yeganə muzeyin – Azərbaycan Xalça Muzeyinin əsası qoyulub.

Tanınmış alimin eskizləri əsasında toxunmuş “Əfşan”, “Qonaqkənd”, “Ləçəkturunc”, “Şuşa”, “Göygöl”, “Qarabağ”, “Butalı”, “Şəbi-hicran”, “Firdovsi”, “Səməd Vurğun”, “Vaqif”, “Füzuli”, “Nəsimi”, “Əcəmi” və s. xalçaları Azərbaycan xalçaçılıq sənətinin qiymətli nümunələrindəndir.