Azərbaycan Xalça Muzeyi Novruz Bayramı ilə bağlı tədbirlər proqramını təqdim edir.

15 mart saat 14:30-da muzeyin Şuşa filialı bütün arzu edənləri Xurşidbanu Natəvanın həyat və yaradıcılığına həsr olunan “Məclisi-üns – xan qızının qonaqları” adlı musiqili poeziya axşamına dəvət edir. Muzeyin qonaqları məşhur şairənin dövründəki yaradıcılıq məclislərinin ab-havasına baş vuracaqlar. Tədbirin əvvəlində Xurşidbanu Natəvan haqqında film təqdim ediləcək, daha sonra məclis Azərbaycanın Xalq artisti Gülyanaq Məmmədova, Əməkdar artist Anar Şuşalı, aşıq Qəmər Həsənəliyeva və digərlərinin ifasında konsert proqramı ilə davam edəcək.

Martın 16 saat 15:30-da balaca dostlarımıza “Cırtdanın Novruz Bayramında macəraları” tamaşası təqdim ediləcək. Uşaqlar sevimli nağıl personajları ilə görüşərək, qədim Novruz Bayramının adət-ənənələrinə səyahət edəcək və yeni biliklərə sahib olacaqlar. Muzeydə tamaşa – qeyri-adi və olduqca maraqlıdır! Biletləri muzeyin kassasında əldə edə bilərsiniz. Biletin qiyməti 3 AZN.

21-26 mart tarixlərində isə “Uşaq Muzeyi” şöbəsi gənc muzey qonaqlarımızı müxtəlif ustad dərslərində iştirak etməyə dəvət edir. Onlar arasında xna bəzəkləri, şəkərbura naxışının vurulması, yumurta boyamaq, boşqab üzərində novruz simvollarının çəkilməsi, qurama, yumşaq oyuncaqların hazırlanması, “şəddə”nin toxunması və açıqçaların hazırlanması kimi bayram mövzusunda ustad dərslər yer alacaqdır.